ଭୁବନେଶ୍ୱର,୨୮/୧୦: ବଜାରରେ ଏବେ ମାଳମାଳ ନକଲି ହେଲ୍ମେଟ୍ । ପୁଲିସ ମଧ୍ୟ ଯାଞ୍ଚ କରୁନଥିବାରୁ ବ୍ୟବସାୟୀ ଏହାକୁ ବିକୁଛନ୍ତି । ଅସଲି ଆଉ ନକଲି ମଧ୍ୟରେ ଜନସାଧାରଣ ଫରକ ଜାଣିପାରୁନଥିବାରୁ ସେମାନେ ଏହାକୁ କିଣୁଛନ୍ତି । ଏହାଦ୍ୱାରା ସେମାନେ କେବଳ କ୍ଷତିଗ୍ରସ୍ତ ହେବା ସାର ହେଉଛି । ହେଲେ କେନ୍ଦ୍ର ଖାଉଟି ବ୍ୟାପାର ମନ୍ତ୍ରାଳୟ ସବୁ ରାଜ୍ୟର ଜିଲ୍ଲାପାଳମାନଙ୍କୁ ନକଲି ହେଲମେଟ୍ ହଟାଇବାକୁ ନିର୍ଦ୍ଦେଶ ଦେବା ପରେ ଏବେ ଅସାଧୁ ବ୍ୟବସାୟୀମାନେ ଚିନ୍ତାରେ । ଅସାଧୁ ବ୍ୟବସାୟୀମାନେ ବିଆଇଏସ୍ ଓ ଆଇଏସ୍ଆଇ ମାର୍କର ଅପବ୍ୟବହାର କରୁଥିବା ଅଭିଯୋଗ ହେବା ପରେ ଏହି ନିର୍ଦ୍ଦେଶ ଦିଆଯାଇଛି । ହେଲମେଟ୍ ନିର୍ମାତା ବିଆଇଏସ୍ (ବ୍ୟୁରୋ ଅଫ୍ ଇଣ୍ଡିଆନ୍ ଷ୍ଟାଣ୍ଡାର୍ଡ) ଲାଇସେନ୍ସ ପାଇଛନ୍ତି କି ନାହିଁ ତାହା ଜାଣିବାକୁ ଖାଉଟି ବିଆଇଏସ୍ କେୟାର ଆପ୍ କିମ୍ବା ବିଆଇଏସ୍ ୱେବ୍ସାଇଟ୍ରେ ଏହାକୁ ଯାଞ୍ଚ କରିପାରିବେ ।
ଆଇନ କହୁଛି ଆଇଏସ୍ଆଇ (ଇଣ୍ଡିଆନ୍ ଷ୍ଟାଣ୍ଡାର୍ଡସ ଇନ୍ଷ୍ଟିଚ୍ୟୁସନ୍ ମାର୍କ) ଚିହ୍ନ ନ ଥିବା ହେଲମେଟ୍ ପିନ୍ଧିବା ଯୋଗ୍ୟ ନୁହେଁ । ହେଲେ ପୁଲିସକୁ ଭକୁଆ ବନାଉଛି ଆଇଏସ୍ଆଇ ଚିହ୍ନ ରହିଥିବା ନକଲି ହେଲ୍ମେଟ୍ । ସାଧାରଣତଃ ଆଇଏସ୍ଆଇ ଚିହ୍ନ ଥିବା ହେଲ୍ମେଟ୍କୁ ଲୋକେ ଅସଲି ଭାବନ୍ତି । ହେଲେ ନକଲି ହେଲ୍ମେଟ୍ରେ ମଧ୍ୟ ଆଇଏସ୍ଆଇ ଚିହ୍ନ ରହୁଛି । ନିର୍ଦ୍ଧାରିତ ମାନର ହେଲ୍ମେଟ୍ ଗ୍ରାହକଙ୍କୁ ଯୋଗାଇବାର ନିୟମ ରହିଥିଲେ ମଧ୍ୟ ଏହାକୁ ଅନେକ ମାନୁନାହାନ୍ତି । ନକଲି ହେଲ୍ମେଟ୍ରେ ସାମାନ୍ୟ ଆଘାତ ହେଲେ ଏହା ନଷ୍ଟ ହୋଇଯାଇଥାଏ । ଏହା ବିକ୍ରି କରିବା ବେଆଇନ୍ ହୋଇଥିଲେ ମଧ୍ୟ ଏଥିରେ କଟକଣା ଲଗାଯାଇପାରୁ ନାହିଁ । ସେହିପରି ନକଲି ହେଲମେଟ୍ ବିକୁଥିବା ବ୍ୟବସାୟୀଙ୍କ ବିରୋଧରେ କୌଣସି ପଦକ୍ଷେପ ନିଆଯାଉନାହିଁ ।
କେତେ ପ୍ରକାର ହେଲ୍ମେଟ୍
ମୁଖ୍ୟତଃ ୪ ପ୍ରକାର ହେଲ୍ମେଟ୍ ରହିଥାଏ । ଯଥା-ହାଫ୍ ଫେସ୍ ହେଲ୍ମେଟ୍, ଫୁଲ୍ ଫେସ୍ ହେଲ୍ମେଟ୍, କ୍ୟାପ୍ ହେଲମେଟ୍ , ମଡ୍ୟୁଲାର ହେଲମେଟ୍ । କ୍ୟାପ୍ ହେଲ୍ମେଟ୍ ବ୍ୟାନ୍ ହୋଇଥିବାରୁ ଏହା ବଜାରରେ ଉପଲବ୍ଧ ହେଉନି । ଏବେ ମୁଖ୍ୟତଃ ଅନ୍ୟ ୩ ପ୍ରକାର ହେଲମେଟ୍ ମିଳୁଛି ।
ବଜାରକୁ ଆସିଥିବା ନୂଆ ହେଲ୍ମେଟ୍
ଏବେ ବଜାରକୁ ନୂଆ କରି ବ୍ଲୁ ଟୁଥ୍ ଡିଭାଇସ୍ କମ୍ୟୁନିକେସନ୍ ହେଲ୍ମେଟ୍ ଆସିଛି । ଏହାକୁ ପିନ୍ଧି ଜଣେ ଚାଳକ ଜରୁରି ସ୍ଥିତିରେ ବ୍ଲୁ ଟୁଥ୍ ମାଧ୍ୟମରେ ଫୋନ୍ରେ କଥା ହୋଇପାରିବେ । ସେହିପରି ଗାଡ଼ି ଚଲାଇବା ସମୟରେ ସମ୍ମୁଖରୁ ଅନ୍ୟ କୌଣସି ଗାଡ଼ିର ହେଡ୍ଲାଇଟ୍ରୁ ଆଲୋକ ପଡ଼ିଲେ ସ୍ପଷ୍ଟ ଦେଖାଯାଏ ନାହିଁ । ସେପରି ସ୍ଥଳେ ହେଲ୍ମେଟ୍ରେ ଧଳା ରଙ୍ଗର ଭାଇଜରକୁ ବଦଳାଇ ହଳଦିଆ ରଙ୍ଗର ଭାଇଜର ଲଗାଇ ହେବ ।
